हेटौंडा–९ मा ८६ लाखको लागतमा मानवेश्वर कुण्ड निर्माण हुँदै

समाचार

गृहपृष्ठ
समाचार

मानवेश्वर कुण्ड हेटौंडा–९ मा ८६ लाखको लागतमा मानवेश्वर कुण्ड निर्माण हुँदै

सिधाखबर सोमबार, फागुन २९, २०७९

हेटौंडा \ हेटौंडा उपमहानगरपालिका–९ कुखरेनी खोला सामुदायिक वन क्षत्रेमा मानवेश्वर कुण्ड निर्माण थालिएको छ । बागमती प्रदेश सरकार पर्यटन, उद्योग तथा सहकारी मन्त्रालय मातहत रहेको पर्यटन विकास आयोजनाले विनियोजन गरेको ८६ लाख रुपियाँ बजेट मार्फत कुण्डको पहिलो चरणको काम थालिएको हो ।

मानवेश्वर कुण्ड निर्माण समितिले डिपिआर तयार पारेर ९० मिटर लम्बाई र ५० मिटर चौडाईको पोखरीमा निर्माण हुने प्रोटेक्सन वालको हेटौंडा उपमहानगरपालिकाका प्रमुख मीनाकुमारी लामाले शिलान्यास गरेकी हुन् ।

कुण्डको शिलान्यास गर्दै नगरप्रमुख लामाले आन्तरिक र वाह्य आगन्तुकका लागि कुखुरेनी नयाँ गन्तव्यको रुपमा विकास हुने बताइन् । उनले उपमहानगर क्षेत्रमा यस्तै पोखरी र तालहरु निर्माण गरेर पर्यटकको आक्रषण केन्द्र बनाउने तयारीमा लागिरहेको बताइन् । उनले भनिन् ‘ताल हेर्न र घुम्न कै लागि भनेर धेरै मानिस हेटौंडा हुँदै आवत जावत गर्छन, उनीहरुलाई हेटौंडामै रोक्ने वातवरण बनाउन जरुरी छ ।’

यसै कुखरेनी खोलाको पारी हेटौंडा–१४ मा फनपार्क सहितको आक्रषक पिकनिक स्पोट बनाउँनका लागि छलफल चलिरहेको उनले बताइन् । बजारबाट नजिक रहेका खाली ठाउँलाई व्यवस्थापन गर्दै लैजाने तयारी उपमहानगरले गरीरहेको उनल बताइन् । बागमती प्रदेशको राजधानी समेत रहेको उपमहानगरपालिकालाई व्यवस्थित र सुन्दर बनाउने कुरामा सबैको साथ र सहयोग आवश्यक रहेको उनको भनाई थियो ।

बागमती प्रदेश पर्यटन आयोजनाले पहिलो चरणका लागि विनियोजन गरेको ८६ लाख रुपियाँबाट पहिलो चरणमा कुण्ड निर्माणको काम थालिएको निर्माण समितिले जनाएको छ । कुखरेनी खोला सामुदायिक वन उपभोक्ता समितिका अध्यक्ष अन्जन दाहालको अध्यक्षतामा भएको कुण्ड शिलान्यास कार्यक्रममा हेटौंडा ९ का वडा अध्यक्ष सुकराम केसी, १४ का अध्यक्ष दीपक खड्का, धाप टोलविकास सस्थाका अध्यक्ष लिला थापा र कुण्ड निर्माण उपभोक्ता समितिका अध्यक्ष रमेशकुमार मिश्रको आतिथ्यता रहेको थियो ।

प्रकाशित मिति: सोमबार, फागुन २९, २०७९ ०८:३८

प्रतिक्रिया दिनुहोस्