बागमती प्रदेश सभा ठप्प

समाचार

गृहपृष्ठ
समाचार

बागमती प्रदेश सभा बागमती प्रदेश सभा ठप्प

सिधाखबर शनिबार, मंसिर २३, २०८०

हेटौडा / बागमती प्रदेश सभा दुई महिना देखी बैठक बिहिन भएको छ । वर्षे अधिवेशनको अन्त्य भएको दुई महिना बितिसक्दा पनि बागमती प्रदेश सभाको बैठक बस्न सकेको छैन । गएको आइतबार प्रदेशसभाका सभामुख भुवनकुमार पाठकले हिउँदे अधिवेशन आह्वान गर्ने, संसदीय समितिका सभापति चयन गर्ने विषयमा छलफल गर्न सर्वदलीय बैठक बोलाउनु भएको थियो । यी विषयमा छलफल गर्ने भने तापनि छलफल नै नभई सर्वदलीय बैठक बिना निष्कर्ष टुङ्गियो । तिन घण्टासम्म चलेको बैठकमा संसदीय समितिको निर्वाचन र प्रदेश सभा वैठकको विषय भन्दा पनि बजेट कार्यक्रमका विषयमा छलफल केन्द्रित भएको छलफलमा सहभागी एक प्रदेश सभा सदस्यले जानकारी दिनुभयो । प्रदेश सरकारको बजेट कार्यक्रम कार्यान्वयन, निर्वाचन क्षेत्र विकास कार्यक्रम (संसद विकास कोष) र बजेटका सन्दर्भमा सरकार र प्रतिपक्षबिचको सम्झौताबारे बैठकमा छलफल भएको थियो ।

सहमति कार्यान्वयनको चरणमा नगएसम्म अन्य विषयमा छलफल हुन नसक्ने भन्दै एमाले र राप्रपाले अडान राखेका छन् । “हामी छलफलको चरणमा छौँ, प्रदेशमा ५ वटा समिति, ७ वटा दल छौँ, मिलाउने प्रयासमा छौँ, माघतिर हिउँदे अधिवेशन हुन सक्ने सम्भावना छ, बजेट सन्तुलित नभएको प्रतिपक्षका साथीहरुको भनाइ रहेको छ ।” एक प्रदेश सभा सदस्यले भन्नुभयो । बैठकमा मुख्यमन्त्री शालिकराम जम्कट्टेलले बजेट कार्यक्रम कार्यान्वयनका सन्दर्भमा अख्तियार दुरुपयोग अनुसन्धान आयोगको सुझावपत्र प्रस्तुत गर्नुभएको थियो । अख्तियारले आर्थिक वर्षको बीचमा बजेट कार्यक्रममा नयाँ योजना थप गर्ने र रकमान्तर नगर्न सुझाव दिनु भएको थियो ।

बागमती प्रदेशका मुख्यमन्त्री जम्कट्टेलले सर्वदलीय बैठकमा विपक्षी दलहरुबिच नै समस्या आएको बताउँदै समन्वयात्मक ढंगले सरकार अगाडि बढ्ने बताउनु भयो । सरकारले प्रतिपक्ष दलसँग गरेका सबै प्रतिबद्धता पूरा गर्दै सरकारको कामलाई व्यवस्थित बनाउने उहाँले बताउँदै विपक्षीसँग सहकार्य गरी छिट्टै अधिवेशन आह्वान गर्ने उहाँले जानकारी दिनुभयो । सरकारले संसदीय समितिको सभापतिको छिट्टै टुङ्गो लगाउने उहाँले जानकारी दिनु भयो ।
बैठक नबस्दा सदनमा आफ्ना कुरा राख्न नपाएको प्रदेश सभा सांसदहरूको गुनासो छ ।

समय समयमा सदन बसे आफ्ना निर्वाचन क्षेत्रका नागरिकको समस्या सदनमा उठाउन पाइनेमा लामो समयदेखि बैठक नबस्दा समस्या भइरहेको सांसदहरू बताउँछन् । गएको असोज २४ गतेदेखी बैठक बस्न सकेको छैन् । यता, सरकार निरीह हुँदा प्रदेश संरचनामाथि नै नागरिकहरूले प्रश्न उठाइरहेको एमाले बागमती प्रदेश सचेतक मधुसुदन पौडेल बताउनु भयो । प्रदेश सभा बैठक छिट्टै बस्ने प्रदेशका आन्तरिक मामिला तथा कानुन मन्त्री गंगानाराण श्रेष्ठले बताउनु भयो । सरकारको प्रवक्ता समेत रहेका मन्त्री श्रेष्ठका अनुसार प्रतिपक्षी दलहरूसँग सहमति भए तत्कालै प्रदेश सभा बैठक बस्नेछ ।

प्रकाशित मिति: शनिबार, मंसिर २३, २०८० १७:१२

#बागमती प्रदेश सभा

प्रतिक्रिया दिनुहोस्