बागमती प्रदेश प्रमुखद्धारा हिउँदे अधिवेशन आह्वान

समाचार

गृहपृष्ठ
समाचार

बागमती प्रदेश प्रमुखद्धारा हिउँदे अधिवेशन आह्वान

सिधाखबर शुक्रबार, फागुन ११, २०८०

file photo

हेटौडा / बागमती प्रदेशका प्रदेश प्रमुख यादवचन्द्र शर्माले प्रदेशसभाको हिउँदे अधिवेशन आह्वान गर्नुभएको छ । प्रदेश प्रमुख शर्माले शुक्रबार एक सुचना जारी गर्नुहुदै प्रदेशसभाको तेह्रौं अधिवेशन आह्वान गर्नु भएको हो । प्रदेश प्रमुख शर्माले जारी गर्नुभएको सूचना अनुसार आगामी फागुन १५ गते मंगलबार दिनको ३ बजेका प्रदेशसभाको बैठक बस्ने छ । बागमती प्रदेश मन्त्रिपरिषद्को सिफारिसमा प्रदेश प्रमुख शर्माले नेपालको संविधानको धारा १८३ को उपधारा (१) बमोजिम प्रदेश सभाको तेह्रौं अधिवेशन आह्वान गर्नुभएको हो ।

विगत चार महिनादेखि सञ्चालन हुन नसकेको बागमती प्रदेशसभाको हिउँदे अधिवेशन फागुन १५ गतेलाई बस्ने निश्चित भएको छ । प्रदेश सरकारको गएको हप्ता बसेको मन्त्रिपरिषद बैठकले फागुन १५ गतेका लागि हिउँदे अधिवेशन आह्वान गर्ने निर्णय गरेको थियो । गत हप्ताको मन्त्रिपरिषदको निर्णय अनुसार फागुन १५ गतेका लागी प्रदेशसभाको अधिवेशन आह्वान गर्न प्रदेश प्रमुख यादवचन्द्र शर्मा समक्ष पत्राचार गर्ने निर्णय समेत भएको थियो ।

प्रदेशका आर्थिक मामिला तथा कानुन मन्त्री बहादुर सिंह लामाका अनुसार प्रदेशसभा अधिवेशन आह्वान गर्नु पूर्व फागुन १३ मा सर्वदलीय बैठक बोलाउने तयारी पनि सरकारले गरेको छ । उहाँले १३ गते दिउँसो सर्वदलिय बैठक बसेर संसदको कार्यसूचि तथा सत्तापक्ष र विपक्ष बिचको विगतको विवाद समाधान गर्ने योजना रहेको बताउनु भयो । सर्वदलीय बैठक सरकारका तर्फबाट प्रदेशसभाका सभामुखले डाक्ने गरी संसद सचिवालयलाई पत्राचार समेत भैसकेको मन्त्री लामाले जानकारी दिनुभयो ।

प्रकाशित मिति: शुक्रबार, फागुन ११, २०८० १५:४४

प्रतिक्रिया दिनुहोस्