बागमती प्रदेशमा आगलागीका कारण २ जनाको मृत्यु

समाचार

गृहपृष्ठ
समाचार

बागमती प्रदेशमा आगलागीका कारण २ जनाको मृत्यु

सिधाखबर बुधबार, चैत ७, २०८०

हेटौडा / आगलागीका घटनाका कारण बागमती प्रदेशमा २ जनाको मृत्यु भएको छ । प्रदेशको १३ जिल्लामा विभिन्न समयमा भएको आगलागीका घटनामा परेर २ जनाको मृत्यु भएको हो । वन निर्देशनालय बागमती प्रदेशका अनुसार वनमा लागेको आगो निभाउने क्रममा यस प्रदेशमा २ जनाको मृत्यु भएको हो । निर्देशनालयका सूचना अधिकारी गोविन्द अर्यालका अनुसार धादिङको बेनिघाट रोराङ गाउँपालिका–७ स्थित जनजागृति महिला सामुदायिक वन क्षेत्रमा लागेको डढेलो निभाउन जाँदा भिरबाट लडेर धनबहादुर थापाको मृत्यु भएको थियो भने रामेछापको खाडादेवी गाउँपालिका–७ मा रहेको भगवती सामुदायिक वनमा लागेको आगो निभाउने क्रममा घाइते भएका कर्णबहादुर मगरको उपचार क्रममा मृत्यु भएको थियो ।

पछिल्लो समय वर्षा कम भएकाले आगलागीको जोखिम पनि उच्च भएको निर्देशनालयले जनाएको छ । हिउँद लागे लगत्तै प्रदेशका विभिन्न जिल्लाका सामुदायिक तथा राष्ट्रिय वन क्षेत्रमा आगलागीका उच्च जोखिमका बिच घटना पनि बढेको थियो । चैत सुरु भएयता मात्र बागमतीका ४ हजार हेक्टर वनमा डढेलो लागेको निर्देशनालयका सूचना अधिकारी अर्यालले बताए । उनका अनुसार रसुवामा मात्र करिब ३ हजार हेक्टर वनमा डढेलोले क्षति पुगेको छ ।

बागमती प्रदेश प्रहरी कार्यालय हेटौंडाका अनुसार गत फागुनदेखि हालसम्मको अवधिमा आगलागीका घटनामा परेर ७ जना घाइते भएका छन् । प्रदेशको काठमाडौं उपत्यका बाहेकका जिल्लाहरुमा भएका आगलागीका घटनामा परेर ७ जना घाइते भएका छन् भने ८५ पश्चौपाय मरेका छन् । प्रदेशका १० जिल्लामा फागुन महिनामा भएको आगलागीका घटनामा परेर ४ जना घाइते भएका छन् । उक्त घटनामा परेर ७३ पशुचौपाय र ३ हजार २२३ पन्छी मरेका छन् । घटनामा ८ पशुचौपाय घाइते भएका छन् ।

सो अवधिको आगलागीका घटनामा परेर ६ पक्की, १६ कच्ची घर तथा १६ गोठ, ३ टहरा र २ सवारीसाधन जलेका छन् । फागुन महिनाको आगलागीका घटनामा आर्थिक रुपमा १ करोड ७१ लाख ३८ हजार रुपैयाँ बराबरको क्षती भएको प्रदेश प्रहरी कार्यालय हेटौंडाको अनुमान रहेको छ । चैत महिनाको ६ दिनमा मात्र आगलागीका घटनामा परेर ३ जना मानिस घाइते भएका छन् भने १२ पशुचौपाय , ९ पन्छी मरेका छन् । आगलागीका घटनामा परेर १ पक्की, ७ कच्ची र ३ गोठ जलेका छन् । प्रहरीका अनुसार उक्त घटनामा ३९ लाख ७ हजार रुपैयाँ बराबरको आर्थिक क्षती भएको छ ।

प्रकाशित मिति: बुधबार, चैत ७, २०८० १९:०८

प्रतिक्रिया दिनुहोस्