आयोजना बैंकबाट योजना छनोट गरी बजेट विनियोजन गर्छौ : मुख्यमन्त्री जम्कट्टेल

समाचार

गृहपृष्ठ
समाचार

आयोजना बैंकबाट योजना छनोट गरी बजेट विनियोजन गर्छौ : मुख्यमन्त्री जम्कट्टेल

सिधाखबर सोमबार, वैशाख ३, २०८१

हेटौडा / बागमती प्रदेशका मुख्यमन्त्री शालिकराम जम्कट्टेलले आगामी आर्थिक वर्षमा आयोजना बैंकबाट योजना छनोट गरी बजेट विनियोजन गर्ने बताउनु भएको छ । मुख्यमन्त्री जम्कट्टेलले आगामी आर्थिक वर्षको बजेट परम्परागत प्रणालीको नहुने बताउनु भयो । प्रदेश सरकारले चालु आर्थिक वर्षबाटै आयोजना बैंक मार्फत योजना छनोट गरी बजेट विनियोजन गर्ने तयारी गरे पनि विभिन्न परिस्थितिका कारण सम्भव हुन नसकेको उहाँले बताउनु भयो । आन्तरिक तयारी र व्यवस्थापनसहित आयोजना बैंक व्यवस्थापन सूचना प्रणालीमार्फत सार्वजनिक गर्न, बजेट तर्जुमा गर्दा प्राप्त सिलिङभित्र प्राथमिकताका आधारमा बजेट प्रस्ताव गरिने उहाँको भनाइ छ । उहाँले ठुला योजनाहरु प्रदेशका गौरवका आयोजनाहरुको बिस्तृत अध्यान गरी आयोजना बैंकको सुचना प्रणालीमा प्रविष्ट गराई प्राथमिक्ता क्रम्मका आधारमा बजेट बिनियोजन गरिने बताउनु भयो ।

प्रदेश सरकारले आगामी आर्थिक वर्षदेखि ‘आयोजना बैंक’ निर्माण गरेर कार्यक्रम छनोट तथा बजेट विनियोजन गर्ने तयारीलाई तिब्र बनाएको हो । प्रदेश सरकार स्थापना भएदेखि आयोजना बैंक निर्माणको बहस चलिरहे पनि कार्यान्वयनमा भने आउन सकेको थिएन । प्रदेश सरकारको चालु आर्थिक वर्ष २०८०÷०८१ को बजेटमाथि दलहरू बिचको विवादले आयोजना बैंकको औचित्यलाई थप पुष्ट्री गरेको थियो । प्रदेश सरकारको चालु आर्थिक वर्षको बजेट कार्यान्वयनका सन्दर्भमा अख्तियार दुरुपयोग अनुसन्धान आयोगले ‘आयोजना बैंक’ निर्माण गरी योजना तथा कार्यक्रमहरूमा बजेट विनियोजन गर्न सुझाव समेत दिएको थियो ।

त्यस्तै आयोजना बैंकको अपरिहार्यतालाई प्रदेशको प्रथम आवधिक योजनाको समीक्षाले समेत देखाएको छ । प्रदेश नीति तथा योजना आयोग मार्फत आयोजना बैंक सञ्चालनमा ल्याउनु पर्ने सुझाव सो समीक्षामा उल्लेख छ । राष्ट्रिय सूचना आयोगबाट हस्तान्तरित प्रदेश आयोजना बैंक व्यवस्थापन सूचना प्रणालीलाई सञ्चालनमा लयाएर योजना छनोट प्रणाली व्यवस्थित, पारदर्शी र सन्तुलित बनाउन जरुरी रहेको औँल्याइएको छ । प्रदेश सरकार स्थापनादेखि नै बागमती सरकारले आयोजना बैंक निर्माणको चर्चा सुरु गरेको थियो ।

सरकारले विगतदेखि नै नीति तथा कार्यक्रममै समावेश गरी आयोजना बैंक निर्माणको विषय अघि सार्दै आएको थियो । तर, कार्यान्वयन भने हुन सकेको थिएन । प्रदेश सरकारले २०७५ र २०७९ मा गरी २ पटक आयोजना बैंक निर्माण गरेको थियो । सरकारको लगानीलाई व्यवस्थित गर्नुको साथै वास्तविक क्षेत्रको लगानी र उत्पादन कस्तो छ, त्यसको फाइदा र बेफाइदाको बारेमा विश्लेषण गर्ने गरी आयोजना बैंक निर्माण गरिएको हो ।

प्रकाशित मिति: सोमबार, वैशाख ३, २०८१ १८:४५

#आयोजना बैंक

प्रतिक्रिया दिनुहोस्