कानुन निर्माण तीन पक्षको सहभागितामा हुनुपर्छ : सभामुख पाठक

समाचार

गृहपृष्ठ
समाचार

सभामुख कानुन निर्माण तीन पक्षको सहभागितामा हुनुपर्छ : सभामुख पाठक

सिधाखबर मंगलबार, जेठ २९, २०८१

फाइल तस्विर

धादिङ \ बागमती प्रदेशका सभामुख भुवन पाठकले सांसद, सरोकारवाला र विज्ञको सहभागितामा मात्र कानुन निर्माण गर्नुपर्ने बताएका छन् ।
बागमती प्रदेश सचिवालयले आज आयोजना गरेको प्रदेशमा कानुन कार्यान्वयनको अवस्था र चुनौती सम्बन्धमा स्थानीय तहसँगको छलफलमा उनले कानुन निर्माण गर्दा सबै पक्षको सहभागिता र अपनत्व हुनुपर्ने बताएका हुन् । “कानुन व्यक्ति, जीवन, विकास र पर्यावरणसँग सम्बन्धित हुनेभएकाले निर्माण पूर्व नै सबैसँग छलफल गरेर बनाउनु पर्छ”, सभामुख पाठकले भने,“यसअघिका धेरैजसो कानुन छलफल नगरी मन्त्रीको आदेशमा कर्मचारीले बनाएर लागू गर्दा समस्या आएको गुनासो छ । अबचाहिँ ख्याल गर्नुपर्छ ।”

बागमती प्रदेशका उपसभामुख अप्सरा चापागाईंले जसको सवाल उसको नेतृत्व भन्ने नीतिअनुसार कानुन निर्माण नहुँदा जनताले फाईदा लिन नसकेकोले विषयगत रुपमा सरोकारवालासँग छलफल गर्नुपर्ने बताए । उनले अब प्रदेशसभाले विरोधाभासपूर्ण कानुन संशोधन गर्नुपर्ने, प्राकृतिक स्रोत, विकास र जनताको सरोकारका कानुन बनाउदा जनतासँग छलफल गर्ने प्रतिबद्धता व्यक्त गरे ।

संविधानसभा सदस्य तथा वरिष्ठ अधिवक्ता कृष्णभक्त पोखरेलले सङ्घ, प्रदेश र स्थानीय तहले संविधान कार्यान्वयन गर्न र आवश्यकताअनुसार सुधार गर्नुपर्ने आवश्यकता औँल्याए । बागमति प्रदेशले बनाएका ७८ कानुनमध्ये ४७ कानुन कार्यान्वयनमा रहेको उल्लेख गर्दै उनले कानुन निर्माणको क्रममा सार्वभौम जनताले जिताएका सासदलाई ह्वीप लगाउन नहुने बताए । यस्तै, कानुन बनाउँदा सर्वाेच्च अदालतको नजिर, संविधानको व्यवस्था, जनताको पक्ष र अन्तर्राष्ट्रिय महासन्धि हेरेरमात्र बनाउनुपर्ने पोखरेलको भनाइ छ ।

प्रकाशित मिति: मंगलबार, जेठ २९, २०८१ ०८:४८

प्रतिक्रिया दिनुहोस्