चित्लाङ फुटबल क्लब फाइनल प्रवेश

समाचार

गृहपृष्ठ
समाचार

प्रदेश लिग फुटबल चित्लाङ फुटबल क्लब फाइनल प्रवेश

सिधाखबर बिहीबार, पुस १८, २०८१

हेटौँडा \ हेटौँडामा जारी दोस्रो संस्करणको बागमती प्रदेश लिग फुटबल प्रतियोगिताको बिहीबार दोस्रो सेमीफाइनल खेलमा काठमाडौंको चित्लाङ फुटबल क्लब फाइनल प्रवेश गरेको छ ।

हेटौँडा–५ स्थित पिप्ले–क्याम्पा रंगशालामा भएको खेलमा ललितपुर फुटबल क्लब ३-१ गोल अन्तरले पराजित गर्दै चित्लाङ फुटबल क्लब फाइनल प्रवेश गरेको छ । उपाधिका लागि शनिबार दिउँसो २ बजे चित्लाङ फुटबल क्लब र दोलखाको टाइगर टिम तिखातालबीच प्रतिस्पर्धा रहने बागमती प्रदेश फुटबल संघ(एन्फा)का महासचिव लवराज ठकुरीले बताउनुभयो ।

आजको खेलमा काठमाडौंका यमन महर्जनले दुई र सुदीप बुढाथोकीले एक गोल गर्नुभएको थियो । महर्जनले खेलको तीन मिनेटमा पहिलो गोल गर्नुभएको थियो भने दोस्रो हाफको ४८ मिनेटमा दोस्रो गोल गर्नुहुँदै क्लबलाई अग्रता दिलाउनुभएको थियो । बुढाथोकीले भने ७२ मिनेटमा एक गोल गर्नुभएको थियो । ललितपुरको तर्फबाट भने ४२ औँ मिनेटमा रामकृष्ण चौधरीले पहिलो हाफमा एक गोल फर्काएका थिए । खेलको म्यान अफ द म्याच काठमाडौंका यमन महर्जन घोषित हुनुभयो । उहाँलाई तीन हजार नगद सहित ट्रफि प्रदान गरिएको थियो ।

बुधबार भएको पहिलो सेमीफाइनल खेलमा दोलखाको टाइगर टिम तिखातालले सिन्धुलीको ब्लुअल्पाइन क्लबलाई २–१ गोलअन्तरले पराजित गरेको थियो । प्रतियोगितामा ११ जिल्लाको लिग विजेता टिमहरुको सहभागिता रहेको थियो ।प्रतियोगिताको उपाधि विजेता टिमले दुई लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्ने महासचिव ठकुरीले बताउनुभयो । यस्तै, विधागत उत्कृष्ट खेलाडीहरुका लागि पनि पुरस्कारको व्यवस्था गरिएको उहाँले बताउनुभयो ।

प्रकाशित मिति: बिहीबार, पुस १८, २०८१ १८:०५

प्रतिक्रिया दिनुहोस्