कैलाश \ मकवानपुरको कैलाश गाउँपालिकामा १६ जना क्षयरोगका विरामीले नियमित औषधि सेवन गरिरहेका छन् । विहीबार क्षयरोग सम्बन्धी वार्षिक समीक्षा कार्यक्रममा उक्त तथ्याङ्क सार्वजनिक गरिएको हो । आव २०८१\ ०८२ मा कैलाशका विभिन्न वडामा १६ जना क्षयरोगका विरामी रहेको र उनीहरुले स्वास्थ्य संस्थाबाट नियमित औषधि सेवन गरिरहेको स्वास्थ्य शाखा प्रमुख तिलकप्रसाद गौतमले बताए ।
कैलाशको वडा नम्बर ३ मा ९ जना, वडा नम्बर ८ मा २ जना वडा ९ मा ४ जना र वडा ५ मा १ जना गरी १६ जनामा क्षयरोग विरामी रहेको गौतमले बताए । उनीहरुको उपचार र औषधि सेवन गरिरहेका छन्, र अझै धेरै परीक्षण गरिनुपर्छ, गौतमले भने ।
कार्यक्रममा गाउँपालिका अध्यक्ष लोकबहादुर मुक्तानले पालिकामा रहेका दुईवटै ल्यावलाई भरपुर प्रयोग गर्दै क्षयरोग परीक्षणलाई वृद्धि गर्नुपर्ने बताए । संक्रमित विरामीको औषधि सेवनमा ध्यान दिन स्वास्थ्यकर्मीलाई आग्रह गर्दै क्षयरोग परीक्षणको शिविर सञ्चालनको तयारी गर्न निर्देशन दिएका छन् । राज्यको शिक्षा र स्वास्थ्य क्षेत्रको सूचक मुख्य मेरुदण्ड हो । त्यसलाई ध्यानमा राखेर काम गरिनुपर्ने बताए । वित्तीय समानीकरणको अनुदान रकम वृद्धिमा यही क्षेत्रका सूचकको महत्वपूर्ण भूमिका रहने अध्यक्ष मुक्तानले बताए ।
कार्यक्रममा प्रमुख प्रशासकीय अधिकृत रामप्रसाद शर्मा कंडेलले डाटावेसमा वडातहका स्वास्थ्य चौकी कमजोरी रहेकाले त्यसतर्फ ध्यान दिन आग्रह गरेका थिए । विरामीप्रति लगाव राख्दै नागरिकलाई दिने सेवामा कमी नआउनु उनले निर्देशन दिएका छन् । क्षयरोगको परीक्षण संख्या कम भयो, यसको दायरा बढाउनुपर्छ, कंडेलले भने ।
लाजका कारण क्षयरोग परीक्षणमा नागरिक नआउने प्रमुख गौतमले बताए । विरामी स्वास्थ्य संस्थामा नआउनु र अन्य स्थानमा परीक्षण गरेता पनि संस्था संस्थामा रिर्पोट नहुनले लुकेको टिबी पत्ता लगाउन समस्या रहेको उनले बताए । कार्यक्रममा जनस्वास्थ्य कार्यालय मकवानपुरका प्रतिनिधि कान्ज्य कुमार चौधरी र सुजन थापा, पालिकाभित्रका स्वास्थ्य चौकीका ईन्चार्जलगायतको सहभागिता रहेको थियो ।
