पुनः सञ्चालन होला त हेटौँडा कपडा उद्योग ?

समाचार

गृहपृष्ठ
समाचार

हेटौँडा कपडा उद्योग पुनः सञ्चालन होला त हेटौँडा कपडा उद्योग ?

सिधाखबर बुधबार, माघ १७, २०८०

मकवानपुर \ खण्डहर बनेको हेटौँडा कपडा उद्योग सञ्चालनका विषयमा विभिन्न टिका टिप्पणी हुने गरेको छ । हरेक वर्ष सरकारको वार्षिक नीति तथा कार्यक्रम र बजेटमा समावेश हुने गरेको हेटौँडा कपडा उद्योग पुनः सञ्चालन कम चुनातीपूर्ण विषय भने होइन ।

बजेट कार्यक्रममा समावेश हुँदै आएको उक्त विषयले पुनः एक पटक चर्चा पाएको छ । वर्षौँदेखि रुग्ण अवस्थामा रहेका सरकारी उद्योग सञ्चालनका लागि चासो देखाएसँगै हेटौँडा कपडा उद्योगले पनि पुनः जीवनको पर्खाइमा रहेको छ । सरकारको स्वामित्वको उक्त उद्योग सञ्चालनका लागि प्रधानमन्त्रीले अबको एक साताभित्र मोडालिटी तयार पारेर पेस गर्न निर्देशन दिइएको छ । जसका कारण सो उद्योगका विषयमा विभिन्न कोणबाट टीकाटिप्पणी भइरहेको छ ।

लामो समय सो उद्योगमा काम गरेका प्रकाश पौडेलका अनुसार सरकारले हेटौँडा कपडा उद्योग हाल के अवस्थामा सञ्चालन गर्न निकै कठिन रहेको छ । पुरानो प्रविधि भएकाले सो उद्योगमा जोडिएका मसिनहरू सञ्चालन आउन सक्ने अवस्था नरहेको उनले बताए । सरकारले सो उद्योग सञ्चालनका लागि प्रविधि सहित पूर्वाधार पुनः निर्माणमा पनि रकम खर्चनु पर्ने अवस्था रहेको उनको भनाइ छ ।

उनका अनुसार हाल कै प्रविधिलाई मात्र मर्मत गरेर उद्योग सञ्चालन गर्ने हो भने पनि करिब २५ करोड रुपैयाँ भन्दा बढी रकम खर्च गर्नुपर्ने हुन्छ । सो खर्चबाट उद्योगको सबै मेसिनहरू सञ्चालनमा आउने अवस्था नरहेको उनले बताए । सोही प्रविधिमा सरकारले उद्योग सञ्चालन गरेको खण्डमा कोरा कपडा मात्र तयार गर्ने र ५०० जना जनशक्तिलाई रोजगारी दिन सकिने उनको भनाइ छ । सो प्रविधिको प्रयोगबाट बजारमा प्रतिस्पर्धा गर्न कठिन हुने र थप घाटा व्यहोर्नुपर्ने अवस्था आउने उनले बताए ।

यता बागमती प्रदेश उद्योग परिसंघका उपाध्यक्ष स्वागतराज प्याकुरेलका अनुसार सरकारले हेटौँडा कपडा उद्योग पुनः सञ्चालनका लागि नयाँ प्रविधिका मेसिनहरू भित्राउनु पर्ने हुन्छ । उद्योगमा रहेका अधिकांश मेसिनका पार्टपुर्जा मर्मत हुन अवस्थामा नरहेकाले सञ्चालनमा समस्या हुने उनको भनाइ छ । सरकारले हेटौँडा कपडा उद्योग सञ्चालनका लागि निकै ठुलो मात्रामा पुँजी खर्चनुपर्ने उनले बताए । उनका अनुसार सरकारले सो उद्योग सञ्चालन गरेर वर्तमान बजारसँग प्रतिस्पर्धा गर्न कठिन रहेकाले व्यापारमा भन्दा सेवा सुविधा प्रवाहमा लगानी गर्नुपर्छ । सरकारले उद्योग सञ्चालनको वातावरण तयार गरेर उद्योगीहरूलाई लगानीमा प्रोत्साहन गर्नुपर्ने उनको भनाई । -रातोपाटीबाट

प्रकाशित मिति: बुधबार, माघ १७, २०८० १०:०९

#हेटौँडा कपडा उद्योग

प्रतिक्रिया दिनुहोस्