एमाले मकवानपुरको अध्यक्षमा पोखरेल, सचिवमा विष्ट निर्वाचित

समाचार

गृहपृष्ठ
समाचार

एमाले मकवानपुरको अध्यक्षमा पोखरेल, सचिवमा विष्ट निर्वाचित

सिधाखबर सोमबार, जेठ २१, २०८१

हेटौंडा \ नेकपा एमाले मकवानपुरको नयाँ नेतृत्वका लागि श्रीधर पोखरेल विजयी भएका छन् । सोमबार भएको मतगणनामा पोखरेलले तीन सय १३ मत प्राप्त गर्दै निर्वाचित भएका हुन् । उनले अब एमाले मकवानपुरको नेतृत्व सम्हाल्ने छन् । अध्यक्ष पदका अर्का उम्मेदवार ईन्द्रमान स्याङ्तानले दुई सय ६२ मत प्राप्त गरे भने लालबहादुर थापाले १ सय ६६ र देवराज रिमालले ११ मत प्राप्त गरेका छन् ।

त्यस्तै, पार्टीको उपाध्यक्षतर्फ हिदम लामा विजयी भएका छन् । उनले चार सय ७६ मत प्राप्त गर्दै उपाध्यक्ष पदमा निर्वाचित भएका हुन् । उपाध्यक्ष पदका सुनील मोक्तानले एक सय ९७, भरत दुलालले ३८ र ध्रुव चौलागाईले २६ मत प्राप्त गरेका छन् । सचिवतर्फ भने सीता विष्ठ विजयी भएकी छिन् । उनले २ सय ९७ मत प्राप्त गर्दै निर्वाचित भएकी हुन् । उनको निकटम प्रतिस्पर्धी मदन कुमार दाहालले दुई सय ५५ मत प्राप्त गरे भने अर्का उम्मेदवार राजन थापाले एक सय ७१ मत प्राप्त गरेका छन् ।
यसैगरी उपसचिव पुरुषतर्फ फुर्वा लामा निर्वाचित भएका छन् । उनले दुई सय ४१ मत प्राप्त गर्दै विजयी भएका छन् । उपसचिवमा दीपक खड्काले एक सय ६७ , ईन्द्र नेपालले एक सय २९, कृष्णप्रसाद चौलागाईले ८६ र खेमराज जर्गामगरले एक सय मत प्राप्त गरेका छन् । उपसचिव (महिला) आरती पाठक विजयी भएकी छिन् । उनले दुई सय ४१ मत प्राप्त गर्दै निर्वाचित भएकी हुन् । उपसचिवका अन्य उम्मेदवारहरु कल्पना बलामीले एक सय ५६, जुना दाहालले एक सय ५२ र पार्वती रानाले एक सय ७२ मत प्राप्त गरेका छन् ।

हेटौँडा ४ पशुपति मन्दिर हलमा मतगणना गरिएको थियो । जिल्लाका ११ हजार ६ सय ८४ जना पार्टी सदस्यहरुबाट अधिवेशनको लागि प्रतिनिधिहरु चयन गरिएको थियो । अधिवेशनमा कुल ७ सय ७७ जना प्रतिनिधि रहेका थिए । जसमा ७ सय ६५ जनाले आइतबार मतदान गरेका थिए । पदाधिकारीहरुको मत गणना सके लगत्तै सदस्य पदको मतगणना गरिने जनाइएको छ ।

प्रकाशित मिति: सोमबार, जेठ २१, २०८१ १५:५९

प्रतिक्रिया दिनुहोस्