हेटौंडा देखी काठमाडौं जाने छोटो दुरीका सबै सडक अवरुद्ध

समाचार

गृहपृष्ठ
समाचार

हेटौंडा देखी काठमाडौं जाने छोटो दुरीका सबै सडक अवरुद्ध

सिधाखबर आइतबार, साउन २८, २०८०

हेटौंडा / हेटौंडाबाट काठमाडौं जाने छोटोदुरीका सबै सडक पहिरोका कारण अवरुद्ध भएका छन् । शनिबार राति देखि परेको अविरल वर्षाका कारण हेटौंडा–भैंसे–भीमफेदी सडक खण्ड पहिरोको कारण अवरुद्ध भएको छ । भीमफेदी २ भैंसे बजारबाट २ किलोमिटर अगाडी पहिरो खसेकोले सडक अवरुद्ध भएको प्रहरीले जनाएको छ ।

त्यस्तै, कुलेखानी–सिस्नेरी–काठमाडौं सडकखण्डमा पनि पहिरो खसेपछि अवरुद्ध भएको छ । मकवानपुरको इन्द्रसरोवर गाउँपालिका वडा नम्बर ३ भालुडाँडा स्थित कुलेखानी सिस्नेरी काठमाडौं सडक खण्डमा पहिरो खस्दा बाटो अवरुद्ध भएको हो । त्यस्तै, त्रिभुवन राजपथको भीमफेदी ९ लामीडाँडा क्षेत्रमा पहिराले सडक अवरुद्ध भएको जनाइएको छ ।

अविरल वर्षा भइरहेकाले अवरोध पहिरो हटाउँन सकिने अवस्था नरहेको मकवानपुर ट्राफिक प्रहरी प्रमुख प्रहरी निरीक्षक वसन्त आचार्यले बताउनुभयो । त्यस्तै, कान्तिलोक पथ पनि बकैया गाउँपालिका वडा नम्बर ११ आँपचौरमा पहिरो खस्दा सडक अवरुद्ध भएको प्रहरीले जनाएको छ । हेटौंडा काठामाडौं जाने सवारी साधनहरुलाई वैकल्पिक बाटो बाटो प्रयोग गर्न प्रहरीले आग्रह गरेका छन् ।

भारी वर्षाका कारण हेटौंडा ४ हुँदै बग्ने कर्रा खोलामा आएको बाढी बस्तीहरुमा पसेको छ । गर्दोही क्षेत्रमा रहेका केहीघरहरु डुवानमा परेको प्रहरीले जनाएको छ । खोलामा पानीको वहाव बढ्नेक्रममा रहेकाले उक्त क्षेत्रहरुमा सुरक्षित स्थानमा जान प्रहरीले जानकारी गराएको छ । विगतमा पनि भारी वर्षातको बेला उक्त क्षेत्रहरु डुब्दै आइरहेको छ ।

प्रकाशित मिति: आइतबार, साउन २८, २०८० ११:३८

#हेटौंडाबाट काठमाडौं जाने छोटोदुरीका सबै सडक

प्रतिक्रिया दिनुहोस्