बागमतीमा मन्त्रालयको संख्या १३ पुग्यो, आलेमगरलाई युवा तथा खेलकुदको जिम्मा

समाचार

गृहपृष्ठ
समाचार

भागवन्डा बागमतीमा मन्त्रालयको संख्या १३ पुग्यो, आलेमगरलाई युवा तथा खेलकुदको जिम्मा

सिधाखबर बिहीबार, जेठ ३, २०८१

हेटौंडा \ बागमती प्रदेशमा मन्त्रालयको संख्या बढाइएको छ । सत्ता साझेदार दलहरूबीच भागबन्डा मिलाउन मन्त्रालयको संख्या १२ बाट १३ पुर्‍याइएको हो । बुधबार साँझ बसेको बामगती प्रदेश सरकारको मन्त्रिपरिषद् बैठकले मौजुदा सामाजिक विकास मन्त्रालय टुक्र्याएर १३ वटा बनाइएको हो ।

प्रदेश सरकारका प्रवक्ता एवं आन्तरिक मामिला तथा कानुनमन्त्री गंगानारायण श्रेष्ठले प्रदेशमा रहेको समाजिक विकास मन्त्रालयअन्तर्गत रहेको युवा तथा खेलकुद विभागलाई टुक्र्याएर युवा तथा खेलकुद मन्त्रालय बनाइएको जानकारी दिए ।

यससँगै करिब ४५ दिनदेखि जिम्मेवारी विहीन रहेकी विना विभागीयमन्त्री रमा आले मगरले युवा तथा खेलकुद मन्त्रालयको जिम्मेवारी पाउने भएकी छिन् । गत १९ चैतमा मन्त्री नियुक्त भएकी मन्त्री मगरलाई जिम्मेवारी दिन माओवादीबाट मन्त्री रहेकी कुमारी मोक्तानले सम्हाल्दै आएको सामाजिक विकास मन्त्रालय टुक्र्याइएको हो ।

एकीकृत समाजवादीकी सांसद मगरलाई मुख्यमन्त्री शालिकराम जम्कट्टेलले तेस्रोपटक १९ चैतमा विश्वासको मत लिएकै दिन मन्त्रीमा नियुक्त गरेका थिए । त्यसवेला मन्त्री नपाए विश्वासको मत नदिने अडानबीच उनलाई विनाविभागीय मन्त्री नियुक्त गरिएको थियो । बागमतीमा मुख्मन्त्रीसहित माओवादीबाट चार, एमालेका पाँच, एकीकृत समाजवादीका तीन र हाम्रो नेपाली पार्टीका एक गरी १३ मन्त्री बनेका छन् ।

प्रकाशित मिति: बिहीबार, जेठ ३, २०८१ ०९:४१

प्रतिक्रिया दिनुहोस्