• २०७७ चैत्र २९, आइतबार
  • भोलिबाट दोश्रो बकैया साहित्य महोत्सव

    १३ फाल्गुन २०७७, बिहीबार २०:४६

    हेटौंडा । दोश्रो बकैया साहित्य महोत्सवको तयारी पूरा भएको आयोजकले जनाएको छ । बकैया–५ श्रीपुर स्थित प्रभात माविमा झरना साहित्यिक परिवारको आयोजनामा शुक्रबार र शनिबार हुने कार्यक्रमको तयारी पूरा भएको अध्यक्ष दीपक गौतमले जानकारी दिएका हुन् ।

    पहिलो दिन शुक्रबार बालबालिका विशेष रचना वाचन, बहसमुलक कार्यक्रम र शिक्षक प्रतिनिधिको रचना वाचन हुनेछ । ‘पठन संस्कृतिको एवम् विद्यार्थीको सिर्जनशिलता विकासमा विद्यालयको भूमिका’ विषयमा पहिलो दिन बहस हुने छ । बालबालिकाहरुमा रहेको साहित्यिक प्रतिभा उजागर गर्ने उद्देश्यले पहिलो दिन बालबालिका विशेष रचना वाचन हुने अध्यक्ष गौतमले बताए ।

    दोश्रो दिन स्रष्टा सम्मान सहित युवा पुस्ताको रचना वाचन हुने गौतमले बताए । ‘हामीले यो वर्ष अघिल्लो वर्ष भन्दा भिन्न कार्यक्रमहरु सहित महोत्सवको आयोजना गरेका छौं,’ उनले भने,‘यो पटक विशेष गरी बालसाहित्य केन्द्रित महोत्सव हुनेछ । उनीहरुको प्रतिभा हामी सुन्छौं । दोश्रो दिन स्रष्टा सम्मान सहित विविध कार्यक्रम हुनेछ ।’

    बकैया साहित्य महोत्सवमा विभिन्न ८ जना स्रष्टाहरुलाई सम्मान गरिने भएको छ । यो वर्षको होमनाथ–टीकामाया प्रतिभा सम्मान सुनसरीका अग्रज साहित्यकार प्रा।डा। भीम उपाध्यायलाई प्रदान गरिने भएको छ । १५ हजार ५ सय ५५ रुपैयाँको यो पुरस्कार नुरप्रसाद गौतमले स्थापना गरेका हुन् । यस्तै, विनोद सुवेदीले स्थापना गरेको ११ हजार १ सय ११ रुपैयाँ राशीको बाबुलाल–भोजमाया प्रतिभा सम्मान मकवानपुरका अग्रज कवि आरआर चौलागाईँलाई प्रदान गरिँदैछ ।

    रमेशमोहन अधिकारीले स्थापना गरेको ११ हजार १ सय ११ रुपैयाँ राशीको शिव–सावित्री अधिकारी स्मृति मुक्तक सम्मान अग्रज मुक्तककार ज्ञानुवाकर पौडेललाई प्रदान गरिँदैछ भने अर्पण पराजुली र दर्पण पराजुलीले स्थापना गरेको  ५ हजार ५ सय ५५ रुपैयाँ राशीको खडानन्द–मनमाया स्मृति प्रतिभा सम्मान नुवाकोटकी युवा साहित्यकार सुमित्रा सुमीलाई प्रदान गरिने अध्यक्ष गौतमले जानकारी दिए ।

    यस्तै बकैया–४ का वडा अध्यक्ष राजन दंगालले स्थापना गरेको ५ हजार ५ सय ५५ रुपैयाँ राशीको सुशीला दंगाल स्मृति सिर्जनशील नारी सम्मान मकवानपुरकी साहित्यकार रुकु कार्कीलाई प्रदान गरिँदै छ । तुलसी गिरीले स्थापना गरेको ५ हजार ५ सय ५५ रुपैयाँ राशीको सञ्जीवनी बुटी साहित्य सेवा सम्मान बकैया–४ का मनहरी लामिछानेलाई प्रदान गरिँदै छ ।

    बकैया गाउँपालिकाले स्थापना गरेको ५ हजार ५ सय ५५ रुपैयाँ राशीको झरना–बकैया पत्रकारिता पुरस्कार खेम बोलखेलाई प्रदान गरिँदैछ भने चन्द्र कुमार राईले स्थापना गरेको २ हजार ५ सय ५ रुपैयाँ राशीको झरना–बकैया नवप्रतिभा पुरस्कार–बकैया–४ की दीपशिखा घिमिरेलाई प्रदान गरिने भएको छ । यस्तै, स्थानीय प्रतिभावको रुपमा बासुरी बादक गोपाल घतानीलाई पनि सम्मान गरिँदै छ ।

    यसमा तपाइको मत

    Your email address will not be published. Required fields are marked *


    *