राक्सिराङको सात कन्या प्राबिको सात कोठे भवन शिलान्यास

समाचार

गृहपृष्ठ
समाचार

राक्सिराङको सात कन्या प्राबिको सात कोठे भवन शिलान्यास

सिधाखबर शनिबार, मंसिर ८, २०८१

हेटौँडा / मकवानपुरको राक्सिराङ गाउँपालिका वडा नम्बर ७ नम्बर तल्लो गर्लिङमा रहेको सात कन्या प्राथमिक विद्यालयको सात कोठे भवनको शुक्रवार शिलान्यास गरिएको छ । बागमती प्रदेशसभा सदस्य इन्द्रबहादुर बानियाँले सो भवनको शिलान्यास गरेका हुन । विद्यालय भवन शिलान्यास गर्दै नेता बानियाँले विकट गाउँमा सडक सञ्जालसँगै शिक्षा, स्वास्थ्य, सडकलगायत पूर्वाधार विकास र सामाजिक आर्थिक विकासमा स्थानीय, प्रदेश र सङ्घीय सरकारले ध्यान दिएको बताए । बानियाँले राक्सिराङ ७ स्थित गर्लिङसम्म पुग्ने सडक स्तरीकरण गर्न प्रदेश सरकारमार्फत बजेटको व्यवस्था गरिने प्रतिबद्धता जनाएका छन् । करिब २ करोड रूपै या लागतमा सामुदायिक विद्यालयको भवन निर्माण हुने भएको छ ।

लिसा हिमालय इभीमार्फत दिगो विकासका लागि एकता नेपालको आर्थिक सहयोगमा २ करोड १ लाख रुपैयाँको ठेक्कामार्फत विद्यालय भवन निर्माण हुन लागेको हो । गृह आर्किटेक एन्ड बिल्डर्स प्रालिसँग २०८१ कात्तिक २० गते विद्यालय निर्माणको सम्झौता भएकोमा २०८२ कात्तिक १८ गतेसम्म सम्पन्न गर्ने उल्लेख छ । पक्की विद्यालय भवन नहुँदा यस भेगका विद्यार्थीहरू जस्ताको छानोयुक्त कच्ची भवनमा अध्ययन गर्दै आएका थिए । पक्की भवन निर्माण भएसँगै अध्ययनमा सहज हुने र विद्यार्थीहरू पनि विद्यालयतिर आकर्षित हुने विश्वास लिइएको छ ।

विद्यालय निर्माण हुने स्थान बानियाँको निर्वाचन क्षेत्र पनि हो। सात कन्या प्राथमिक विद्यालयका विद्यालय व्यवस्थापन समितिका अध्यक्ष एकराज मुक्तानको अध्यक्षतामा भएको भवन शिलान्यास कार्यक्रममा प्रदेशसभा सदस्य बानियाँको प्रमुख आतिथ्य रहेको थियो । कार्यक्रममा बागमती प्रदेशका पूर्व भौतिक पूर्वाधार विकास राज्यमन्त्री सन्तबहादुर चेपाङ, राक्सिराङ गाउँपालिकाका अध्यक्ष राजकुमार मल्ल, दातृ संस्था लिसा हिमालय इभीका एक्टिङ कन्ट्री डाइरेक्टर अञ्जन पौडेल, नेपाली काँग्रेस मनहरी सभापति प्रकाश बर्तौला, राक्सिराङ ७ का वडाध्यक्ष रामबहादुर प्रजालगायतले मन्तव्य व्यक्त गरेका थिए । उद्घाटन गरिएको क्षेत्र राक्सिराङको विकट स्थान मानिन्छ ।

प्रकाशित मिति: शनिबार, मंसिर ८, २०८१ १२:२०

प्रतिक्रिया दिनुहोस्